Íslenski landsliðsmaðurinn Kolbeinn Sigþórsson er með ótrúlegt markahlutfall fyrir íslenska landsliðið en þegar kemur að Evrópuleikjum fyrir Ajax hefur Kolbeinn farið í gegnum mikla eyðimerkurgöngu.
Hollenski fjölmiðillinn Voetbalzone greinir frá því að Kolbeinn hafi leikið 969 mínútur fyrir Ajax í Evrópukeppnum án þess að skora.
Kolbeinn fór illa með ansi góð færi í gær þegar Ajax gerði 1-1 jafntefli við APOEL frá Nikósíu og ljóst að það verður ansi erfitt fyrir Hollandsmeistarana að komast upp úr riðli sínum í Meistaradeildinni.
Íslenski markahrókurinn hefur mátt þola mikla gagnrýni í hollenskum fjölmiðlum en Aad de Mos, fyrrum þjálfari Ajax, gekk það langt að kalla Kolbein sökudólg.
Þrátt fyrir að hafa skorað þrennu í síðasta deildarleik sínum þá hefur Kolbeinn ekki náð að þagga niður gagnrýnisraddirnar og nær því væntanlega ekki fyrr en hans fyrsta Evrópumark fyrir félagið er komið í hús.
Athugasemdir