Addó var útnefndur þjálfari ársins á lokahófi Fótbolta.net fyrir Inkasso- og 2. deild karla í gærkvöldi en það eru þjálfarar og fyrirliðar sem velja. ÍR hefur verið að gera atlögu við að fara upp undanfarin ár en nú loksins hafðist það.

„Við lærðum gríðarlega mikið á síðasta sumri þar sem við töpuðum fyrir Hetti og duttum út. Ég vil meina að við höfum náð að styrkja hópinn vel og héldum lykilmönnum. Breiddin fór með okkur upp."

Jón Gísli Ström var markahæsti leikmaður deildarinnar og útnefndur besti leikmaðurinn líka í gær. Verður ekki erfitt að halda honum?

„Það verður bara að koma í ljós. Ég held ekki, ég held að menn séu mjög ánægðir með það sem er í gangi þarna og þetta er mjög samheldinn hópur. Ég á von á því að allir verði áfram sem stóðu sig mjög vel í sumar og held að það verði ekkert vesen," sagði hann en Jón Gísli segir sjálfur í viðtali að hann lofi 15 mörkum næsta sumar.

„Ég hef trú á því," sagði Addó aðspurður um markmið Jóns Gísla. „Ef hann heldur rétt á spilunum og æfir eins og maður og við höldum sama kjarnanum sem býr til þessi mörk fyrir hann þá hef ég trú á því."

Nánar er rætt við hann í sjónvarpinu hér að ofan.