Fyrsta leik dagsins í spænsku úrvalsdeildinni, La Liga, var að ljúka nú fyrir stuttu. Þetta var annar leikurinn í sjöundu umferðinni, en það voru Granada og Leganes sem áttust við.

Fyrir leikinn var Leganes með sjö stig um miðja deild, en Granada var án sigurs í næstneðsta sæti deildarinnar. Því var það eiginlega nauðsynlegt fyrir Granada að taka öll þrjú stigin í dag.

Það tókst hins vegar ekki... Það hefur ekki verið neitt sérstaklega mikið skorað í spænsku úrvalsdeildinni hingað til á tímabilinu og í dag var aðeins eitt mark gert. Það gerði Argentínumaðurinn Alexander Szymanowski á 76. mínútu fyrir Leganes og þar við sat.

Lokaniðurstaðan í þessum leik, 1-0 fyrir gestina frá Leganes og þeir eru nú með tíu stig. Granada hefur ekki farið jafn vel af stað og eru með aðeins tvö stig þegar sjö leikjum er lokið.