Landsliðskonan Sif Atladóttir var á skotskónum er lið hennar Kristianstad mætti Göteborg í úrvalsdeild kvenna í Svíþjóð í dag.

Heimakonurnar í Göteborg komust yfir þegar 13 mínútur voru búnar og staðan var 1-0 í leikhlé. Um miðjan seinni hálfleikinn náði Kristianstad að jafna og þar var að verki Sif Atladóttir með sitt fyrsta mark á tímabilinu. Hún fékk síðan nokkrum mínútum síðar að líta gula spjaldið.

Þetta mark reyndist ekki nóg fyrir Íslendingalið Kristianstad þar sem Göteborg svaraði með tveimur mörkum og lokatölur þess vegna 3-1 á Valhalla IP í Göteborg.

Kristiandstad, sem leikur undir stjórn Elísabetar Gunnarsdóttur, er í mikilli fallbaráttu, en eftir 18 leiki er liðið með 12 stig í tíunda sæti. Liðið er tveimur stigum frá fallsæti.