Cesena fór í heimsókn til Torino í kvöld í ítalska bikarnum en Hörður Björgvin Magnússon leikur með Cesena og spilaði hann allan leikinn.

Torino spilar í Seria A á meðan Cesena spilar í Seria B. Munurinn á liðunum var mikill og nánast frá fyrstu mínútu en Alessandro Gazzi kom heimamönnum yfir snemma leiks.

Aðeins tíu mínútum síðar var Emiliano Moretti búinn að tvöfalda forskot Torino.

Maxi Lopez og Marco Benassi skoruðu svo sitt hvort markið í seinni hálfleik en þess á milli minnkaði Emmanuel Cascoine muninn fyrir Cesena.

Öruggur sigur Torino var þó staðreynd og eru Hörður Björgvin og félagar úr leik í bikarnum.