Laugardalsvöllur
Breiðablik mun mæta Aktobe frá Kasakstan á Laugardalsvelli, en ekki heimavelli sínum, Kópavogsvelli, þar sem völlurinn stenst ekki kröfur UEFA. Þetta staðfesti Magnús Valur Böðvarsson, vallarstjóri Kópavogsvallar við Fótbolta.net í dag.
Kópavogsvöllur er metinn sem C-völlur af UEFA, en til þess að standast kröfur um að spila á vellinum hefði völlurinn þurft að vera B-völlur.
Til þess að standast kröfur sem B-völlur þyrfti að fjölga sætum í stúkunni og þá er völlurinn ekki með klósettaðstöðu fyrir gestalið. Á þessu stigi þurfa einnig vellir að vera með flóðljós, sem Kópavogsvöllur er ekki með.
UEFA hefði gert undanþágu á þessu hefði Aktobe samþykkt að spila á Kópavogsvelli, en félagið samþykkti það þó ekki og hafnaði að spila á vellinum. Það þarf því að leika á Laugardalsvelli.
Leikur Breiðabliks og Aktobe fer því fram á fimmtudaginn klukkan 20:00 á Laugardalsvelli.
Athugasemdir
