Fernando Torres vonast til að komast í guðatölu hjá AC Milan og sagðist stefna á sama stall og gamlar goðsagnir á borð við George Weah, Marco van Basten og Filippo Inzaghi.
Spænski landsliðsmaðurinn skrifaði undir tveggja ára lánssamning við AC Milan á sunnudag, en hann kemur til liðsins frá Chelsea eftir þrjú mögur ár á Stamford Bridge.
,,Allir leikmenn eru ólíkir, en Van Basten, Weah og Inzaghi voru í guðatölu," sagði Torres á blaðamannafundi í dag.
,,Ég vil ná sama árangri og þeir. Ég er öðruvísi leikmaður, en kannski eftir nokkur ár verður mín treyja númer 9 á safninu."
,,Ég vil nýta þetta tækifæri. Þetta er áskorun sem ég þurfti og ég er mjög ánægður. Þetta er þriðja stóra deildin sem ég spila í og ég hlakka til."
Athugasemdir