Rúnar Vífill Arnarson, formaður landsliðsnefndar, er fullur bjartsýni fyrir leik Hollands og Íslands sem fram fer á morgun. Rúnar og félagar hans í landsliðsnefndinni nýttu stund milli stríða í dag og spókuðu sig um í Amsterdam.
„Gengið hefur verið draumi líkast. Það er frábært að fá tækifæri til að taka þátt í þessu og fylgjast með uppgangi landsliðsins. Það er bara snilld," segir Rúnar.
„Ég er bjartsýnn fyrir leikinn á morgun. Ég held að við vinnum... eða tökum stig að minnsta kosti. Ég lofa því. Eitt stig á móti Hollandi á útivelli hlýtur að teljast gott."
Rúnar segir að fagmennskan kringum landsliðið hafi aukist mikið undanfarin ár.
„Þetta er heljarinnar útgerð og er bara að aukast. Með auknum árangri þá eykst útgerðin. Það er bara svoleiðis. Við búum að því að hafa gríðarlega gott starfsfólk hjá KSÍ og það hefur fengið mikla reynslu," segir Rúnar en viðtalið má sjá í heild sinni í sjónvarpinu hér að ofan.
Athugasemdir