Ivan Bubalo var að klára sitt annað tímabil með Fram. Í sumar skoraði hann 10 mörk í 19 leikjum í Inkasso-deildinni og alls skoraði hann 20 mörk í 45 leikjum fyrir Fram yfir tvö tímabil.

„Við erum ekki búnir að gera upp við okkur með Bubalo. Hann hefur að mörgu leyti staðið sig vel í sumar, sérstaklega seinni hlutann," sagði Hermann Guðmundsson, formaður Fram, í samtali við Fótbolta.net á dögunum.

Landi Bubalo, Dino Gavric, verður áfram hjá Fram.

Færeyski miðjumaðurinn Högni Madsen, sem hefur leikið með Fram í sumar, er hins vegar farinn heim, rétt eins og Bubalo.

Högni á þrjá A-landsleiki fyrir Færeyjar og hefur allan sinn feril leikið í heimalandinu, fyrir utan í sumar.