UNICEF á Íslandi og Knattspyrnufélagið Valur undirrituðu í dag þriggja ára samstarfssamning við athöfn á Hlíðarenda. Markmið samstarfsins er að styrkja starfsemi beggja aðila í gegnum fjáröflun og kynningarstarf.
UNICEF á Íslandi mun sinna fræðslu um réttindi barna fyrir bæði iðkendur og þjálfara Vals og leiðbeina félaginu um innleiðingu Barnasáttmála Sameinuðu þjóðanna í öllu sínu starfi með börnum. Merki UNICEF verður á öllum treyjum Vals í körfubolta, handbolta og fótbolta í öllum deildum og flokkum.
Valur mun afla fjár á meðal fyrirtækja sem styðja samstarfið. Það mun bæði nýtast til réttindagæslu og réttindafræðslu fyrir börn á Íslandi – og í alþjóðlegu hjálparstarfi UNICEF. UNICEF, Barnahjálp Sameinuðu þjóðanna, berst fyrir réttindum barna á heimsvísu og er leiðandi í hjálparstarfi fyrir börn í heiminum. Valur mun nýta þá fjármuni sem myndast úr samstarfinu til að styðja við bakið á starfi barna-og unglingasviði Val sem og afreksstarfi Vals.
Á athöfninni á Hlíðarenda áðan undirrituðu samstarfssamninginn Bergsteinn Jónsson, framkvæmdastjóri UNICEF á Íslandi, og Björn Zoëga, formaður Vals.
„Þetta er spennandi samstarf sem við tökum fagnandi. Við hlökkum til að vinna með Val og kynna Barnasáttmálann fyrir börnum og starfsfólki. Það er mikilvægt að fræða börn um réttindi sín og ná til stórs hóps af ungu fólki. Börnin eru framtíðin og það eru þau sem taka við," segir Bergsteinn Jónsson hjá UNICEF á Íslandi.
„Samstarfsfyrirtækin sem styrkja samtarfið munu styðja við alþjóðlegt hjálparstarf, sem og réttindagæslu fyrir börn á Íslandi – og um leið stuðla að uppbyggingu á íþróttalífi fyrir börn hér á landi," segir Bergsteinn.
„Við í Val erum afar spennt fyrir þessu verkefni, UNICEF er að vinna frábært starf í þágu barna hér á landi og erlendis. Ég er þess fullviss um að sr. Friðrik Friðriksson, stofnandi Vals, yrði afar stoltur af samstarfinu. Við munum nú fara í þá vinnu að kynna verkefnið fyrir tilvonandi styrktaraðilum sem verður skemmtilegt því þetta samstarf er í raun fyrsta sinnar tegundar hér á landi," segir Björn en í sjónvarpinu hér að ofan má sjá viðtal við hann.
Athugasemdir