Fótbolta.net mótið: Grindavík endar í 5. sæti

Einn leikur fór fram í A-deild Fótbolta.net mótsins í kvöld og var það leikur um 5. sætið í mótinu á milli Breiðabliks og Grindavíkur en leikið var í Fífunni.

Fyrsta mark leiksins kom á 66. mínútu og var það Guðmundur Friðriksson sem kom Breiðablik yfir.

Grindvíkingar voru hins vegar ekki lengi að jafna leikinn og var það Alexander Veigar Þórarinsson sem skoraði mark Grindavíkur á 70. mínútu.

Ekki voru fleiri mörk skoruð í venjulegum leiktíma og þurfti því að grípa til vítaspyrnukeppni.

Þar reyndust Grindvíkingar sterkari og sigruðu leikinn og enda þeir gulu því í 5. sæti Fótbolta.net mótsins.