Steini og lærimeyjar hans eru úr leik í bikarnum
Þorsteinn Halldórsson, þjálfari Breiðabliks, var eðlilega svekktur þegar Fótbolti.net náði af honum tali eftir 3-1 tap gegn Þór/KA í 16-liða úrslitum Borgunarbikarsins.
Lestu um leikinn: Breiðablik 1 - 3 Þór/KA
„Að sjálfsögðu voru þetta mikil vonbrigði. Þetta var hundfúlt. Við raunverulega gefum þeim tvö mörk þannig að þær ná góðri forystu. Mér fannst við díla vel við sóknarleikinn þeirra heilt yfir og ég held að þær hafi ekki skapað sér eitt einasta opið færi allan leikinn. Samt fáum við á okkur þrjú mörk. Það segir kannski ákveðna sögu um leikinn. Þær opnuðu okkur aldrei. Það er bara staðreynd.“
Það má að vissu leyti segja að Sandra Mayor hafi verið munurinn á liðunum í dag. Hún skoraði þrjú mörk, þar af tvö upp úr litlu, á meðan Blikum gekk illa að nýta sína sénsa. Hvernig ætluðu Blikar að eiga við hana?
„Hún er náttúrulega frábær í fótbolta en hún fékk ekkert einasta færi allan leikinn og skapaði ekkert einasta færi allan leikinn. Það segir ýmislegt um það hvernig við náðum að díla við ákveðna hluti en við skorum ekki úr þeim færum sem við erum að fá. Það er munurinn í þessum leikjum. Þær refsa fyrir okkar mistök og við gerum það ekki,“ sagði Steini sem var þokkalega sáttur við frammistöðu síns liðs þrátt fyrir úrslitin.
Framundan er tveggja vikna landsliðshlé en Steini er ekki mjög hrifinn af því þar sem fámennt verður á æfingum hjá honum og leikmenn skila sér seint til baka fyrir stórleikinn á móti Stjörnunni þann 16. júní.
„Ég held ég verði með átta á æfingum þannig að ég veit ekki alveg hvernig ég á að nýta fríið. Ég held ég fái mína leikmenn á æfingu daginn fyrir Stjörnuleikinn. Það er náttúrulega bara partur af því að vera með leikmenn í landsliðinu. Ég held ég geri ógeðslega lítið sem hjálpar liðinu öllu."
„Ég vonast bara til þess að þær komi heilar úr þessum verkefnum sem þær eru að fara í. Svo tek ég stöðuna á því daginn fyrir Stjörnuleikinn. Ég er ekki að fara að nýta þetta frí í neitt sem hentar öllu liðinu. Það er gallinn við þetta helvítis landsleikjahlé. Maður fær leikmenn bara daginn fyrir leik.“
Hægt er að horfa á allt viðtalið við Steina hér að ofan en þar kemur hann nánar inn á leikinn, innáskiptingar sínar, landsleikjahléið og fjarveruna í síðasta deildarleik.
Athugasemdir
