Þegar þessi frétt er skrifuð er 27 stiga hiti í Antalya og samkvæmt upphaflegu plani ætti æfing íslenska liðsins að vera í gangi. Í gær barst fjölmiðlum þó tilkynning um að Heimir Hallgrímsson og hans menn hefðu breytt dagskránni vegna hitans.

Æfing dagsins verður klukkan 17 að staðartíma en þá verður hitinn ekki eins mikill.

Fótbolti.net mætti til Antalya í gærkvöldi og fylgist vel með öllu í kringum leikinn en auk fjölda frétta á síðunni sjálfri verða samskiptamiðlar okkar, til dæmis Snapchat og Instagram, iðandi af lífi.

Leikurinn sjálfur verður 21:45 að staðartíma á föstudagskvöld, 18:45 að íslenskum. Hitastigið ætti þvi ekki að vera vandamál þá en ljóst er að mönnum verður heitt í hamsi í stúkunni.

Ólafur Ingi Skúlason, miðjumaðurinn reyndi, býst við ærandi hávaða á vellinum eins og hann sagði í viðtali við útvarpsþátt Fótbolta.net.