„Fólk leggur það á sig að koma hingað upp eftir í stormi og má ekki einu sinni fara með popp í salinn og þá verðum við að bjóða upp mörk, vító og skemmtilegheit," sagði Kristján Guðmundsson þjálfari Leiknis eftir að liðið tryggði sér sæti í úrslitum Reykjavíkurmótsins í kvöld. Leiknir sigraði Fjölni eftir vítaspyrnukeppni en eftir venjulegan leiktíma var staðan 3-3.
Lestu um leikinn: Leiknir R. 8 - 7 Fjölnir
Ingvar Ásbjörn Ingvarsson kom til Leiknis á láni frá FH á dögunum og spilaði vel í vinstri bakverði í kvöld.
„Það er hugmyndin að hann taki þá stöðu. Hann er fenginn með það í huga. Við vitum að hann getur spilað kantinn og fleiri stöður en þarna vantar okkur leikmann. Við vonumst til að Ingvar haldi áfram að bæta sig, þetta var mjög góð frammistöðu."
Kristján tók við Leikni í haust og líkar vel í nýju starfi. „Þetta er aðeins öðruvísi en ég bjóst við en mjög gaman. Þetta er ferskur hópur með góðri aldurssamsetningu," sagði Kristján en ætlar Leiknir að stefna á að fara beint aftur upp í Pepsi-deildina í sumar eftir fall síðastliðið haust?
„Lið sem var að fara að niður í haust að setja stefnuna aftur upp. Það verður að vera út frá réttum forsendum, við verðum að vera með mannskap og lið í það. Það er ekki sjálfgefið að fara beint aftur upp eftir að maður fellur úr deild, það er alveg ljóst."
Hér að ofan má sjá viðtalið í heild sinni.
Athugasemdir