Duwayne samdi við Stjörnuna í mars en hann kom ekki til landsins fyrr en í gær.

„Það var mikið af pappírsvinnu. Ég hafði ekki áhyggjur af því að þetta myndi ganga, þetta var meira spurning um hvenær. Sem betur fer er ég kominn hingað og ég ætla að gera mitt besta fyrir Stjörnuna," sagði Duwanye sem hefur kynnt sér lið Stjörnunnar á internetinu.

„Ég sá fögnin hjá strákunum á YouTube og þau eru nokkuð fyndin. Ég er til í að sjá einver af fögnunum í sumar en ekki öll," sagði Duwanye brosandi.

Áfall að fara úr hitanum á Jamaíka í kuldann í Noregi
Duwayne er frá Jamaíka en hann hefur undanfarin ár leikið í Noregi. Duwayne var hjá Sarpsborg en þar voru Ásgeir Börkur Ásgeirsson, Guðmundur Þórarinsson, Haraldur Björnsson og Þórarinn Ingi Valdimarsson á meðal liðsfélaga hans. Duwayne segist hafa vanist kuldanum í Noregi en fyrst um sinn hafi það verið erfitt eftir að hann kom úr sólinni á Jamaíka.

„Þetta var smá áfall. Ég kom úr 20-30 stiga hita yfir í frost. Það var ruglað," sagði Duwayne léttur í bragði.

Ánægður fyrir hönd Wes Mogan
Duwayne hefur verið í landsliðshópi Jamaíka en hann var ekki í síðasta hóp þar sem hann er félagslaus. Í landsliðshópi Jamaíka er einnig Wes Mogan, fyrirliða Leicester.

„Hann er mjög vingjarnlegur náungi. Ég óska honum til hamingju með að vinna titilinn. Ég er mjög ánægður fyrir hans hönd. Það er frábært að sjá Leicester ganga vel. Þetta sýnir að fótbolti snýst ekki bara um það hver á mest af pening. Þetta snýst um það sem þú gerir á leikdag," sagði Duwanye.

Duwanye segist vera opinn fyrir því að vera í Garðabænum í einhvern tíma. „Vonandi get ég verið hér í eitt eða tvö ár. Maður veit aldrei hvar maður endar í fótboltanum. Þetta snýst líka um hversu vel mér gengur hér," sagði Duwayne.

Hér að ofan má sjá viðtalið í heild sinni.