Einn leikur fór fram í Championship deildinni í dag þar sem Jóhann Berg Guðmundsson og félagar fengu Fulham í heimsókn.

Jóhann Berg var í byrjunarliði Charlton venju samkvæmt en það voru gestirnir sem byrjuðu leikinn betur.

Mörk frá Ryan Tunnicliffe og Ross McCormack komu Fulham í 2-0 eftir klukkutíma leik en undir lokin kviknaði á Jóa Berg og félögum.

Jóhann lagði upp mark Johnnie Jackson á 81.mínútu og þegar fimm mínútur voru komnar fram yfir venjulegan leiktíma jafnaði Jordan Cousins leikinn.

Charlton hefur tíu stig eftir tíu umferðir og situr í 17.sæti deildarinnar en Fulham er í 13.sæti.