Fyrsta leik dagsins í enska boltanum er nýlokið þar sem Everton fékk Liverpool í heimsókn í baráttunni um Bítlaborgina.

Simon Mignolet var í hörkustuði í marki Liverpool og varði tvisvar vel í upphafi leiks. Danny Ings kom Liverpool svo yfir á 41.mínútu þegar hann var einn og óvaldaður í vítateig andstæðinganna og skallaði hornspyrnu James Milner í netin.

Forystan entist stutt því undir lok fyrri hálfleiks geystust heimamenn í sókn sem endaði með því að Romelu Lukaku jafnaði metin eftir misheppnaða hreinsun Emre Can.

Síðari hálfleikurinn var í meira lagi tilþrifalítill og komst hvorugt liðið nálægt því að gera út um leikinn.

Úrslitin þýða að Everton fer uppfyrir Arsenal í 6.sæti deildarinnar, um stundarsakir hið minnsta en Liverpool er áfram í 10.sæti.