Zlatan hefur verið orðaður við AC Milan að undanförnu en Svíinn hefur reyndar sjálfur látið hafa eftir sér að hann sé ánægður í herbúðum PSG.

Berlusconi virðist þó ekki vera búinn að gefast upp á því að reyna að fá þennan 33 ára framherja til að snúa aftur á San Siro.

„Ég veit að stuðningsmennirnir myndu vilja sjá hann spila aftur í okkar búningi. Og ég vil það að sjálfsögðu líka", sagði Berlusconi í samtali við sjónvarpsstöð ítalska félagsins í gær.

Gengi AC Milan var ekki gott á síðustu leiktíð en liðið endaði í 10.sæti Serie A og hefur lítið getað síðan Zlatan yfirgaf félagið árið 2012.

Sinisa Mihajlovic tók nýverið við stjórastarfinu hjá AC Milan og hefur nú þegar fjárfest í tveim nýjum framherjum, þeim Carlos Bacca og Luiz Adriano.