Liverpool mætir Oldham í næstu umferð FA-bikarsins en liðið vann nauman 2-1 sigur gegn utandeildarliðinu Mansfeild á útivelli í dag.

Daniel Sturridge lék sinn fyrsta leik fyrir Liverpool og kom liðinu yfir eftir sjö mínútna leik. Skömmu síðar klúðraði hann dauðafæri.

Luis Suarez kom inn sem varamaður fyrir Sturridge og skoraði annað mark Liverpool á 59. mínútu. Markið hefði þó aldrei átt að standa þar sem Suarez tók boltann með hendi áður en hann skoraði.

Mansfield sýndi flotta baráttu og minnkaði muninn á 79. mínútu. Með smá heppni hefði liðið getað jafnað en það átti hættulegar sóknir í lokin.