Það stefnir í spennandi einvígi á milli risanna tveggja á Spáni um titilinn í ár þar sem bæði Barcelona og Real Madrid hafa verið að tapa stigum að undanförnu.

Tveimur stigum munar á liðunum fyrir leiki helgarinnar og gæti vel farið svo að þau hafi sætaskipti á toppnum.

Real Madrid á fyrir höndum erfitt verkefni gegn Athletic Bilbao á útivelli á morgun, en fyrir leikinn vermir liðið toppsætið. Tapi liðið stigum þar getur Barcelona náð í toppsætið þegar Rayo mætir á Nývang á sunnudag.

Stórleikur helgarinn er þó án efa viðureign Spánarmeistara Atletico Madrid og Valencia á sunnudagskvöldið. Liðin sitja í 3. og 4. sæti deildarinnar og munar einu stigi á þeim fyrir leikinn.