Man Utd situr í 5.sæti deildarinnar, 13 stigum á eftir toppliði Leicester þegar fjórtán leikir eru eftir á mótinu en liðið á verðugt verkefni fyrir höndum í dag þegar Man Utd heimsækir ríkjandi Englandsmeistara Chelsea.

„Þetta er stór leikur fyrir okkur, að sjálfsögðu. Ef okkur tekst að vinna komum við okkur í góða stöðu,.” segir Carrick.

Þessi 34 ára gamli Englendingur þekkir það betur en margir hvað þarf til að vinna deildina en hann hefur fimm sinnum orðið enskur meistari á tíu ára ferli sínum hjá Man Utd.

„Getum við unnið titilinn? Já ég trúi því. Ég geri mér grein fyrir því í hvaða stöðu við erum en með því að halda áfram að vinna leiki eigum við möguleika.”

„Ef við misstígum okkur þá verður það erfiðara. Það er undir okkur komið að halda áfram að safna stigum,” segir Carrick.