KF endaði í 7. sæti Kjarnafæðismótsins eftir 3-2 sigur gegn Völsungi í dag.

KF byrjaði leikinn af krafti og fengu hálffæri sem ekkert varð úr. Á 13.mín var Freyþór í vörn Völsungs nærri búinn að gera sjálfsmark þegar hann potaði boltanum frá sóknarmanni KF en heppnin var með honum og boltinn fór rétt framhjá stönginni.

Fyrsta mark leiksins kom nánast úr fyrstu sókn Völsungs þegar Jóhann Þórhallsson fékk boltann við miðju og geystist framhjá einum varnarmanni og skoraði örugglega í hornið fjær.

Á 21.mín braust Valur Reykjalín í gegnum vörn Völsungs en Anton Helgi bjargaði vel. Á 39.mín komst Valur aftur einn í gegn en Freyþór braut á honum rétt utan vítateigs og var réttilega vikið af velli. Það sem eftir lifði hálfleiksins fengu leikmenn KF nokkur hálffæri sem þeir náðu ekki að nýta sér. Staðan í leikhlé 1-0.

KF hóf seinni hálfleik af enn meiri krafti og það var besti maður vallarins, Valur Reykjalín sem náði boltanum eftir skot frá Vitor og skoraði af öryggi. Áfram héldu liðsmenn KF og skoruðu fáum mínútum síðar annað gott mark eftir að Baldur Bragi braust hægra megin inní teig og skoraði með föstu skoti í hornið fjær.

Völsungar voru fljótir að jafna leikinn, þeir fengu aukaspyrnu rétt utan teigs og Jóhann Þórhalls skaut rétt yfir vegginn í nærhornið, glæsilegt mark. Á 69.mín átti Jóhann svo glæsilega sendingu inn fyrir vörn KF á Bjarka Baldvins en Þóroddur Ingvarsson varði stórglæsilega fast skot út við stöng.

Á 75.mín voru KF ingar nærri búnir að skora, en þá átti Jón Árni gott skot að marki sem var varið út í teig en þar var Vitor fyrstur á boltann en náði ekki góðu skoti.

Sigurmarkið kom svo stuttu síðar, títtnefndur Valur braust þá í gegnum vörn Völsungs en var felldur og réttilega vítaspyrna dæmd. Valur fór sjálfur á punktinn og skoraði af öryggi.

Leikurinn fjaraði út eftir markið og sanngjarn KF sigur staðreynd.

Besti maður vallarins: Valur Reykjalín Þrastarson KF – var síógnandi og barðist eins og ljón.

Fjöldi áhorfenda: 105