Roberto Martinez, stjóri Everton er sannfærður um að Aaron Lennon geti hjálpað enska landsliðinu á EM í Frakklandi næsta sumar.
Lennon skoraði eitt mark í 3-0 sigri á Stoke í gær en á meðal áhorfenda var Roy Hodgson, landsliðsþjálfari Englands og nýttu blaðamenn því tækifærið og báðu Martinez um skoðun á Lennon.
„Augljóslega er það ekki undir mér komið en ég fæ tækifæri til að vinna með Aaron á hverjum degi. Hann er mjög mikilvægur fyrir okkar lið."
„Við vitum öll hvaða hæfileika hann hefur. Hann hefur hraðann, er frábær einn á móti einum, er vinnusamur, með góðan leikskilning og mjög reynslumikill."
„Það eru fleiri leikmenn í hans stöðu en hann er að sýna hversu góður hann getur verið og hann gæti klárlega hjálpað enska landsliðinu," segir Martinez.
Lennon er 28 ára gamall og á 21 A-landsleik að baki fyrir England en lék síðast landsleik í febrúar árið 2013.
Athugasemdir