Íslenski landsliðsmaðurinn Birkir Bjarnason var á skotskónum í svissneska boltanum í dag þegar Basel fékk Luzern í heimsókn.

Eftir markalausan fyrri hálfleik kom Birkir heimamönnum yfir í upphafi síðari hálfleiks. Reynsluboltinn Matias Delgado tvöfaldaði svo forystuna með marki úr vítaspyrnu á 72.mínútu.

Renato Steffen gerði svo endanlega út um leikinn með marki á 85.mínútu.

Birkir spilaði allan leikinn fyrir Basel sem er í yfirburðarstöðu á toppi deildarinnar, tólf stigum á undan Grasshoppers sem er í öðru sæti.