Heynckes ætlar að láta af störfum í sumar.

„Ég kom til Bayern því liðið var í mjög erfiðri stöðu og gat ekki fundið stjóra á þessum tímapunkti. Ég sagðist vera tilbúinn að klára verkefnið út tímabilið. Það er samkomulag sem stendur," segir Heynckes.

Julian Nagelsmann, hinn ungi stjóri Hoffenheim, hefur verið orðaður við stjórastarfið hjá Bayern en æðstu menn félagsins eru ekki vissir um hvort hann sé tilbúinn í þetta stórt starf svona snemma á þjálfaraferlinum.

Uli Höness, forseti félagsins, hefur talað um að hann vilji hafa Heynckes í eitt tímabil til viðbótar en Heynckes er ákveðinn í að setjast aftur í helgan stein.

Tuchel, sem yfirgaf Dortmund í leiðindum síðasta sumar, er kjörinn kostur fyrir Bayern að mati Heynckes.

„Ég tel að Thomas Tuchel hafi gæði fyrir Bayern. Hann hefur verið að taka réttu skrefin. Dortmund spilaði virkilega góðan fótbolta undir hans stjórn, gott leikkerfi. Tuchel tók silfurverðlaun, bikarmeistaratitil og lið hans spilaði aðlaðandi fótbolta. Ég hafði gaman af því að horfa á Dortmund," segir Heynckes.

Tuchel yfirgaf Dortmund sem bikarmeistara eftir að hafa lent í útistöðum við forráðamenn félagsins. Hann hefur þann stimpil að erfitt sé að vinna með honum.

„Sem ungur þjálfari gerir þú mistök en þú þarft að læra af þeim. Þú sérð þau í öðru ljósi síðar. Eftir að Tuchel yfirgaf Dortmund hefur liðið ekki spilað eins skemmtilegan fótbolta."