Grótta er í erfiðri stöðu í fallsæti 1. deildarinnar en liðið tapaði fyrir Þrótti 1-0 í kvöld. Sigur toppliðs Þróttar var alls ekki ósanngjarn en Grótta fékk sín færi til að ná að skora.
Lestu um leikinn: Þróttur R. 1 - 0 Grótta
„Leikurinn spilaðist svipað og við bjuggumst við. Ég er smá svekktur með smá einbeitingarleysi í byrjun þegar við fáum þetta mark á okkur. Mér fannst við fá fín færi til að jafna þennan leik og Þróttur fékk sín færi líka," sagði Gunnar Guðmundsson, þjálfari Gróttu, eftir leikinn.
Grótta hefur gengið afleitlega í markaskorun og er aðeins með tvö mörk skoruð eftir tíu leiki.
„Mér fannst við verjast vel og ég var ánægður með margt hjá okkur. Við erum farnir að vera aðeins beittari og verðum að fara að troða boltanum yfir línuna. Við verðum að vera aðeins ákveðnari í teignum. Menn þurfa að vera gráðugri og grimmari til að koma boltanum yfir línuna."
Gunnar segist vera farinn að skoða það að reyna að bæta sóknarleikinn með því að sækja styrk í glugganum sem opnar um miðjan mánuðinn. Viðtalið má sjá í heild í spilaranum hér að ofan.
Athugasemdir