Emil Hallfreðsson var fjarri góðu gamni vegna meiðsla þegar Ísland tryggði sér sæti á EM í síðasta mánuði. Hann fylgdist með frá Ítalíu þegar farseðilinn til Frakklands var tryggður
„Það var súrsæt tilfinning. Þetta var frábært og ég var ótrúlega glaður að við værum búnir að tryggja okkur þetta. Það var leiðinlegt að vera heima í Verona að horfa á þetta í stað þess að taka þátt," sagði Emil við Fótbolta.net í dag.
Emil segir að ekkert verði gefið eftir í komandi leikjum gegn Lettlandi og Tyrklandi.
„Ég held að menn vilji klára þetta með stæl. Markmiðið er að fara í leikinn á móti Lettum og vinna. Það væri hálf kjánalegt að mæta afslappaður til leik og ætla að gefa ekki allt í þetta."
Aron Einar Gunnarsson er í banni gegn Lettum á laugardag sem eykur möguleikana á að Emil byrji á miðjunni. „Ég vonast til þess að byrja og hvort sem Aron er í banni eða ekki þá vonast maður eftir því að spila."
Hellas Verona er einungis með fjögur stig eftir sjö leiki í Serie A og byrjun tímabils hefur valdið vonbrigðum.
„Við erum búnir að vera með ótrúlega mikið af meiðslum. Það eru 6-7 úr byrjunarliðinu frá og þá er erfitt að spila okkar leik. Ég vil meina að við séum með sterkara lið í ár en í fyrra en þegar vantar marga í byrjunarliðið þá er erfitt að eiga toppleiki," sagði Emil.
Hér að ofan má sjá viðtalið í heild sinni.
Athugasemdir