„Það er mjög þægilegt að vera upp í sófa að horfa á umspilsleikina núna. Það er gaman að vera í Katar í afslappaðra umhverfi," sagði Gylfi Þór Sigurðsson við Fótbolta.net í Katar í dag.
Íslenska landsliðið á framundan vináttuleiki gegn Tékklandi og Katar þar sem sætið á HM er í höfn. Króatía og fleiri þjóðir eru hins vegar á leið í umspil á sama tíma.
Íslenska landsliðið á framundan vináttuleiki gegn Tékklandi og Katar þar sem sætið á HM er í höfn. Króatía og fleiri þjóðir eru hins vegar á leið í umspil á sama tíma.
Gylfi og félagar í Everton unnu langþráðan sigur á sunnudag en liðið lagði þá Watford 3-2.
„Það var frábært. Það var kominn tími á að vinna leik og þetta var mikill léttir. Þetta var gríðarlega mikilvægt fyrir okkur upp á sjálfstraustið og framhaldið. Við eigum Crystal Palace næst og vonandi fer þetta að snúast við hjá okkur," sagði Gylfi en Everton kom til baka eftir að hafa verið 2-0 undir í síðari hálfleik.
„Það er góður mórall í hópnum þó að það hafi gengið illa. Þó að staðan hafi verið 2-0 þá gáfumst við ekki upp. Við ætluðum að koma okkur aftur inn í leikinn. Þetta hefur ekki verið nógu gott allt tímabilið en vonandi fer það að breytast."
Ronald Koeman var rekinn frá Everton á dögunum en Gylfi er vanur tíðum stjóraskiptum hjá sínum félögum undanfarin ár.
„Þetta venst svolítið en óvissan og breytingarnar er það versta við þetta. Liðið er alltaf með þjálfara, hvort sem það er tímabundinn þjálfari eða þjálfari sem er ráðinn til margra ára. Þegar kemur að leik eru menn ekki að hugsa út í þetta. Það sem skiptir máli er að liðið fari að spila vel og ná í úrslit," sagði Gylfi að lokum.
Hér að ofan má sjá viðtalið í heild sinni.
Athugasemdir