Real Sociedad vann sinn annan leik í röð í spænska boltanum er liðið heimsótti fallbaráttulið Espanyol fyrr í kvöld.

Jonathas og Carlos Vela komu Real í tveggja marka forystu á fyrstu tíu mínútum leiksins og höfðu heimamenn engin svör.

Espanyol hélt boltanum vel innan liðsins en skapaði sér afar lítið af færum þar sem varnarleikur Real var vel skipulagður og skyndisóknirnar stórhættulegar.

Gestirnir bættu tveimur mörkum við í upphafi síðari hálfleiks og gerði Jonathas lokamark leiksins á 90. mínútu.

Espanyol er aðeins einu stigi frá fallsæti eftir tapið og er Real Sociedad um miðja deild, fimm stigum ofar.