Magnús Már Einarsson
Charlie Austin.
Charlie Austin, framherji Burnley, hefur farið á kostum í ensku Championship deildinni á þessu tímabili. Austin er markahæsti leikmaðurinn í deildinni með 16 mörk í 14 leikjum en hann hefur skorað samtals 20 mörk í öllum keppnum.
Þessi 23 ára gamli leikmaður á hins vegar allt annan feril í fótboltanum en flestir atvinnumenn á Englandi því þegar hann var tvítugur starfaði hann sem múrari og atvinnumennskan virtist vera fjarlægur draumur.
Þessi 23 ára gamli leikmaður á hins vegar allt annan feril í fótboltanum en flestir atvinnumenn á Englandi því þegar hann var tvítugur starfaði hann sem múrari og atvinnumennskan virtist vera fjarlægur draumur.
Þegar Austin var fimmtán ára ákvað Reading að bjóða honum ekki áframhaldandi samning í unglingaliðinu þar sem hann þótti vera of smávaxinn. Það er ákvörðun sem félagið sér eftir í dag.
Úr múraranum í atvinnumennsku:
Eftir vonbrigðin hjá Reading spilaði Austin í sunnudagsdeildum á Englandi með AFC Newbury, Thatcham Town, Kintbury Rangers og heimaliði sínu Hungerford Town. Árið 2007 gekk Austin síðan til liðs við Poole Town FC sem leikur í utandeild sem jafngildir áttundu efstu deild á Englandi.
Samhliða því að leika með Poole vann Austin sem múrari hjá föður sínum. Hann múraði á daginn og æfði síðan á kvöldin með Poole Town. Árið 2009 fóru hjólin hins vegar að snúast hjá leikmanninum.
Austin skoraði 48 mörk í 42 leikjum með Poole Town og Bournemouth sýndi honum áhuga. Bournemouth mátti hins vegar ekki kaupa leikmenn þar sem félagið var í félagaskiptabanni og þá kom Swindon Town inn í myndina.
Danny Wilson, stjóri Swindon, kíkti á leik með Austin og sá hann skora tvö mörk. Í kjölfarið bauð hann Austin samning og draumur leikmannsins rættist, hann var orðinn atvinnumaður í fótbolta.
Ertu viss um að þú viljir áritun?
Austin byrjaði vel í ensku C-deildinni og var fljótur að byrja að skora með Swindon. Sjálfum fannst honum það vera óraunverulegur draumur að vera orðinn atvinnumaður í fótbolta.
,,Fólk biður mig um eiginhandaráritanir núna og ég hugsa: 'Ertu viss?" sagði Austin árið 2010 þegar hann var nýgenginn í raðir Swindon.
Á síðasta tímabili skoraði hann síðan 17 mörk í 27 leikjum með Swindon áður en Burnley keypti hann á eina milljón punda.
Austin spilaði lítið með Burnley á síðasta tímabili vegna meiðsla en í ár hefur hann farið á kostum í Championship deildinni. Austin hefur skorað tuttugu mörk en hann hefur ekki sett nein markmið varðandi markaskorun.
,,Ég hef ekkert markmið. Ég held bara áfram að leggja hart að mér á æfingum og ná því besta fram í leikjum," sagði Austin hógvær eftir að hann skoraði sigurmark Burnley gegn Leeds í fyrrakvöld.
Miðað við ótrúlegan uppgang Austin undanfarin ár er ekki ólíklegt að hann muni spila í ensku úrvalsdeildinni innan tíðar. Arsenal, Liverpool, Aston Villa, Newcastle og Reading eru á meðal félaga sem fylgjast vel með Austin og hver veit nema hann nái ennþá lengra í framtíðinni.
Hér að neðan má sjá myndband af nokkrum mörkum Austin.
Athugasemdir
