Liverpool og Arsenal þurfa að eyða að minnsta kosti 90 milljónum punda til að fá Thomas Lemar frá Mónakó.
Mónakó samþykkti 90 milljóna punda tilboð frá Arsenal á lokadegi félagaskiptagluggans á síðasta ári en Lemar hafnaði því að fara á Emirates.
Samkvæmt frönskum fjölmiðlum munu Frakklandsmeistararnir ekki hlusta á lægri tilboð en þeir telja að verðmæti Lemar hafi hækkað.
Liverpool hefur áhuga á Lemar en gerði þó ekki formlegt tilboð síðasta sumar.
Arsenal vill fá Lemar til að fylla skarð Alexis Sanchez en sterkur orðrómur er í gangi um að Sanchez fari til Manchester City í þessum mánuði.
„Við erum ekki vanir því að selja leikmenn í janúarglugganum en þetta er langur mánuður og margt getur gerst," segir Leonardo Jardim, þjálfari Mónakó.
Lemar er 22 ára og hefur spilað vel í erfiðri titilvörn Mónakó í frönsku deildinni. Liðið missti marga öfluga leikmenn en Lemar er með fjögur mörk og fjórar stoðsendingar fyrir land og lið á þessu tímabili.
Athugasemdir