Heimild: mbl.is
„Það er nokkuð víst að ég er að fara frá Rubin Kazan og ég er með nokkra möguleika opna. Umboðsmaður minn er að ræða við þrjú félög sem stendur og til að mynda er eitt sem ég gæti þess vegna gengið til liðs við í dag ef ég vildi. Ég vil hins vegar fara vel yfir þetta áður en ég ákveð næsta skref og velja vel," segir landsliðsmaðurinn Ragnar Sigurðsson í samtali við mbl.is.
Félag Ragnars í Rússlandi, Rubin Kazan, á í fjárhagsvandræðum og hefur ekki getað borgað leikmönnum laun síðustu mánuði.
„Ég hugsa val mitt út frá landsliðinu, að halda minni stöðu þar og vera í góðu formi þegar HM skellur á. Ef ekkert lið væri búið að hafa samband þá yrði ég kannski órólegur en þegar möguleikar eru fyrir hendi er ég alveg rólegur," segir Ragnar í viðtali við Guðmund Hilmarsson á mbl.
Ragnar hefur meðal annars verið orðaður við sitt gamla félag FC Kaupmannahöfn en samkvæmt frétt Tipsbladet er ólíklegt að Ragnar fari þangað. Haft er eftir Stale Solbakken, þjálfara liðsins, að ekki sé þörf að bæta við miðverði í hans hóp.
Athugasemdir