Lestu um leikinn: Ísland 0 -  1 Mexíkó

„Við erum ósáttir við að fá mark á okkur úr föstu atriði, eins og Heimir sagði náðum við ekki að fara almennilega í það en við erum samt svekktir yfir því. Þetta á að vera okkar styrkleiki og hefur verið styrkleiki landsliðsins undanfarin ár. Það er ákveðið svekkelsi þar en við getum alveg verið stoltir af frammistöðunni, við vörðumst vel allan leikinn í dag," sagði Davíð Þór við Fótbolta.net í nótt.

Mexíkó var með Rafael Marquez fyrrverandi leikmann Barcelona og framherjann Giovani Dos Santos í sínu liði og 30 þúsund stuðningsmenn á sínu bandi. Hvernig var að spila gegn þessu liði?

„Það var erfitt, þeir eru hrikalega góðir fótboltamenn. Ef þeir ætla að setja boltann 40 metra leið á einhvern leikmann þá gera þeir það. Þetta er ekki eins og hjá manni sjálfum að það eru 50% líkur á að þetta fari á réttan mann ef maður ætlar að gefa lengri sendingar en 10 metra," sagði hann en leikið var fyrir um 30 þúsund áhorfendur á Sam Boyd leikvangnum í Las Vegas.

„Þetta var ótrúlega gaman og virkilega gaman að spila fyrir svona mikið af fólki. Það var geggjuð stemmning, ég er orðinn 32 ára en hef ekki spilað marga svona stóra leiki, ég get örugglega talið þá á fingrum annarar handar. Þetta er mikil upplifun fyrir mig og ég get rétt ímyndað mér hvernig er fyrir strákana sem eru rétt skriðnir yfir tvítugt og að spila sinn fyrsta alvöru leik. Það er frábært fyrir þá og okkur alla að taka þátt í þessu."

Davíð Þór var óvænt valinn inn í liðið til að bera fyrirliðabandið og vera leiðtogi hópsins. Hann var maður leiksins að mati Fótbolta.net en gerir hann sér vonir um framhald í landsliðsbúningnum?

„Nei, það er ekkert sem ég er að hugsa um. Ég var rosalega ánægður og stoltur af að hafa fengið tækifæri til að taka þátt í þessum leik. Ég var bara staðráðinn í að gera mitt besta og er ekki að hugsa neitt lengra en það."

Í fyrra kom upp umræða um hvort Davíð gæti orðið landsliðsmaður Færeyja enda tengdur þeirri þjóð fjölskylduböndum. Allir 9 landsleikir hans fyrir Ísland hafa verið vináttulandsleikir svo það væri kannski möguleiki. En er hann enn að hugsa um það?

„Ég er Íslendingur og það er einhver möguleiki sem var skoðaður á sínum tíma og virtist vera ógerlegt sem betur fer því ég hefði aldrei viljað missa af þessum leik. Ég er ennþá Íslendingur!"

Nánar er rætt við Davíð Þór í sjónvarpinu hér að ofan.