,,Það er frábær tilfinning að KR sé komið aftur í efstu deild. Við eigum heima þar og viljum vera þar," sagði Björgvin Karl Gunnarsson, þjálfari KR, eftir að hafa tryggt liðinu sæti í efstu deild kvenna á næsta ári með 2-1 sigri á HK/Víkingi.
,,Þetta var hörkuleikur. Ég er rosalega glaður fyrir hönd KR og stelpnanna. Þetta voru tvö virkilega góð lið og eiga bæði skilið að vera í Pepsi-deildinni."
Gestirnir komu ákveðnir til leiks og voru líklegri til þess að skora heldur en KR. Björgvin Karl segir að leikmenn sínir hafi ekki tekist að fara eftir upphaflega leikplaninu í dag og því hafi fljótlega þurft að gera breytingar.
,,Við ætluðum að pressa þær hærra uppi á vellinum heldur en við gerðum í fyrri leiknum," útskýrði Björgvin Karl. ,,Við náðum því ekki alveg eins og við ætluðum okkur og þurftum því að lagfæra ýmislegt eftir 10 til 15 mínútna leik. HK/Víkingur er frábært lið og synd að þær séu ekki að fara upp um deild líka."
,,Við höfðum betur í dag þó það hafi legið svolítið á okkur. Við náðum að verjast vel og ég er gríðarlega ánægður."
Athugasemdir