Guðrún Jóna stýrði Þrótturum upp um deild í fyrstu tilraun
Reynsluboltinn Guðrún Jóna Kristjánsdóttir þjálfari Þróttar stýrði liði sínu upp í Pepsi-deildina í dag. Þróttarar gerðu góða ferð í Grafarvoginn og unnu 1-0 sigur, 3-1 samanlagt og röndóttu liðin Þróttur og KR leika í deild þeirra bestu að ári. Adolf Ingi hjá Sporttv.is náði til af þjálfaranum í leikslok og byrjaði á að spyrja Guðrúnu Jónu hvort hún hefði átt von á að ná þessum árangri.
„Já, ég átti von á því í vor og þetta var stefnan hjá okkur alveg frá upphafi. Ég hef svo mikla trú á þessum leikmönnum. Þær eru alveg ótrúlegar,“ svaraði Guðrún Jóna.
Harpa Lind Guðnadóttir kom Þrótti yfir í fyrri hálfleik og þá var róðurinn orðinn erfiður fyrir gott lið Fjölnis. Guðrúnu Jónu létti við markið enda þurfti Fjölnir þá að skora tvívegis til að eiga möguleika á sigri í viðureigninni.
„Já, það var góð tilfinning. Þá vissi ég að þær þyrftu að skora tvö og þá var meiri pressa á þeim. Við komum ekkert hingað til að verjast. Við komum til þess að sækja og það tókst rosalega vel. Ég er alveg hrikalega stolt af þeim,“ sagði Guðrún Jóna en hægt er að horfa á viðtalið við hana og fagnaðarlæti Þróttara í sjónvarpinu hér að ofan.
Athugasemdir
