“Þetta var bara virkilega svekkjandi, að fá ekki meira útúr þessum leik. Mér fannst við eiga skilið að fá meira útúr þessu og við sköpuðum okkur færin til þess þannig að ég er frekar vonsvikinn,” sagði Ólafur Þór Guðbjörnsson, þjálfari Stjörnunnar, eftir svekkjandi tap í kvöld gegn liði Slavia Prag frá Tékklandi í 16-liða úrslitum Meistaradeildarinnar.
Lestu um leikinn: Stjarnan 1 - 2 Slavia Prag
Var eitthvað sem kom ykkur á óvart í þeirra leik?
“Nei það var nú ekki mikið sem kom okkur á óvart. Við vorum búin að sjá þær spila og vissum hvað þær væru duglegar að pressa hátt og hraðann á þeim í pressunni og hvað þær opnuðu sig til baka. Það gekk ágætlega það sem við vorum að plana með en við kláruðum ekki færin okkar og svo er náttúrulega fúlt að fá þessi mörk á sig. En við vorum að spila við virkilega gott lið, við neitum því ekkert, og þær voru meira með boltann og við ætluðum að liggja til baka og reyna að loka svæðunum okkar og halda hreinu í þessum leik en því miður tókst það ekki.”
Heldurðu að þú munir breyta upplegginu fyrir leikinn úti?
“Það er ljóst að við þurfum að skora 2 mörk þarna úti og við förum út til þess. En við þurfum líka að passa markið okkar þannig að 1 mark fyrir þær gerir þetta svolítið erfitt.”
Þið náið að jafna en fáið svo mark á ykkur beint í kjölfarið, fóruði kannski aðeins fram úr ykkur?
“Það kemur oft svona 'moment', eins og þú segir, eftir að mark er skorað, menn svona aðeins værukærir og hættulegustu mínúturnar eru fyrstu 2, 3, 4 eftir mark og við féllum í þá gildru núna og það er náttúrulega súrt. En það er bara reynsla fyrir okkur og við erum að spila á þessum stað í keppninni í fyrsta skipti á móti liði í þessum styrkleika og bara frábær reynsla fyrir þennan hóp. Og mér fannst liðið standa sig vel og standa vel undir því.”
Viðtalið við Óla má sjá í heild sinni í spilaranum hér fyrir ofan.
Athugasemdir