Sjö leikir fara fram í ensku úrvalsdeildinni í dag. Veislan hefst á Lundúnaslag West Ham United og Chelsea í hádeginu. Chelsea sem hefur verið á miklu skriði þarf á þremur stigum að halda til þess að halda í við Manchester liðin sem mætast á morgun.

West Ham var nálægt því að ná stigum af toppliði Manchester City um síðustu helgi en David Silva skoraði sigurmark City undir lok leiksins. West Ham er einu stigi frá Swansea City á botni deildarinnar.

Fimm leikir hefjast svo klukkan 15:00. Tottenham menn fá Stoke í heimsókn. Slæmt gengi Tottenham í ensku deildinni undanfarið þýðir að liðið er 18 stigum frá toppliði Manchester City. Liðið hefur ekki unnið leik í deildinni síðan gegn Crystal Palace í upphafi nóvember.

Jóhann Berg og félagar í Burnley taka á móti Watford en þessi tvö lið hafa komið hvað mest á óvart í deildinni í vetur og sitja í 7. og 8. sæti. Þá mætast nýliðaliðin Huddersfield og Brighton í leit að sínum fyrsta sigri síðan 4. nóvember.

Leicester heimsækir Newcastle í lokaleik dagsins. Leicester vann góðan sigur á Burnley um síðustu helgi á meðan Newcastle tapaði fyrir Englandsmeisturum Chelsea.