Lengjubikarinn: Breiðablik skoraði sjö gegn ÍR

Breiðablik lék á als oddi í Lengjubikarnum í dag. Kópavogsliðið mætti ÍR í Fífunni og var leikurinn að klárast nú rétt í þessu.

Arnþór Ari Atlason braut ísinn fyrir Blika á 19. mínútu og var hann aftur á ferðinni 20 mínútum síðar. Áður en flautað var til hálfleiks hafði Gísli Eyjólfsson bætti við þriðja markinu.

Gísli, sem var besti maður Blika síðasta sumar, gerði sitt annað mark snemma í seinni hálfleiknum.

Viktor Örn Margeirsson kom Breiðabliki í 5-0 áður en Arnór Gauti Ragnarsson, sem kom frá ÍBV á dögunum, gerði sjötta markið. Títtnefndur Gísli fullkomnaði svo þrennu sína.

Lokatölurnar 7-0 fyrir Breiðablik! Í þessum riðli, ásamt Breiðabliki og ÍR eru KR, KA, Magni og Þróttur.