Lengjubikarinn: Þægilegt hjá FH og Grindavík

Það er ljóst hvaða lið það verða sem spila í undanúrslitum Lengjubikars karla. FH og Grindavík urðu nú rétt í þessu seinni tvö liðin til að trygja sig áfram.

FH mætti Breiðabliki í Fífunni og komust þar fyrir eftir 20 mínútur. Robbie Crawford, sem samdi við FH á dögunum, skoraði markið, en hann er fyrrum leikmaður Rangers í Skotlandi.

Kristján Flóki Finnbogason lagði upp fyrsta mark FH, en hann gerði út um leikinn í seinni hálfleiknum með tveimur mörkum. Það fyrsta kom á 70. mínútu og það síðara mínútu síðar.

Lokatölur 3-0 fyrir FH, en þeir mæta KR-ingum í undanúrslitum. Hin tvö liðin sem mætast eru Grindavík og KA. Grindvíkingar gerðu góða ferð á Skagann í kvöld og höfðu getur gegn heimamönnum í Akraneshöllinni.

Ingvar Þór Kale setti tóninn eftir eina mínútu þegar hann gerði sjálfsmark. Andri Rúnar Bjarnason bætti við öðru marki áður en Hafþór Pétursson minnkaði muninn, 2-1 fyrir Grindavík.

Andri Rúnar gerði sitt annað mark eftir tæpan hálftíma og í upphafi seinni hálfleiks gerði William Daniels fjórða mark Grindavíkur.

Nýliðarnir tveir í Pepsi-deildinni, KA og Grindavík munu því mætast í undanúrslitum, en það verður fróðlegt að sjá hvernig það fer.