lau 10. maí 2014 10:10
Þriðja liðið
Pistill: Pistlar á Fótbolta.net eru viðhorf höfundar og þurfa ekki endilega að endurspegla viðhorf vefsins eða ritstjórnar hans.
Þriðja liðið - Rauðu spjöldin sem ekki komu
Uppgjör 2. umferðar
Þriðja liðið
Þriðja liðið
Taktu þátt í umræðunni á Twitter!
Taktu þátt í umræðunni á Twitter!
Mynd: Þriðja liðið
Björn Valdimarsson, Gunnar Jarl Jónsson og Birkir Sigurðarson dæmdu leik ÍBV og Stjörnunnar.
Björn Valdimarsson, Gunnar Jarl Jónsson og Birkir Sigurðarson dæmdu leik ÍBV og Stjörnunnar.
Mynd: Fótbolti.net - Magnús Már Einarsson
Valgeir Valgeirsson dæmdi Valur - Keflavík.
Valgeir Valgeirsson dæmdi Valur - Keflavík.
Mynd: Fótbolti.net - Eyjólfur Garðarsson
Valgeir vel staðsettur. Úr Pepsi-mörkunum á Stöð 2 Sport.
Valgeir vel staðsettur. Úr Pepsi-mörkunum á Stöð 2 Sport.
Mynd: Skjáskot af Stöð 2 Sport
Fótboltaáhugamaðurinn veit fátt skemmtilegra en að skeggræða leik gærdagsins og þá eru vafaatriðin oftar en ekki í brennidepli. Menn fullyrða hluti óhikað og vitna oft í greinar eða ákvæði knattspyrnulaganna sem ekki eru til.

Í sumar ætlar Þriðja liðið að fylgja eftir sjónvarpsþáttunum og skrifa pistla um þau atriðið sem falla að dómurum í umræðunni. Ef þú vilt fá álit á einhverju tilteknu atviku þá sendir þú okkur fyrirspurn á @3lidid á Twitter.

Kominn einn í gegn? Í leik ÍBV og Stjörnunnar komst sóknarmaður ÍBV einn í gegn í stöðunni 0-0, hann gerir vel með að taka stefnubreytingu inn í hlaupalínu varnarmanns Stjörnunnar sem er að elta hann. Varnarmaðurinn virðist stjaka við sóknarmanninum og við það missir hann jafnvægið og fellur. Greinilegt leikbrot, að okkar mati. Þar sem manni finnst þetta alveg augljóst eftir að hafa séð þetta í sjónvarpi þá veltir maður því fyrir sér hvers vegna var ekkert dæmt? ÍBV sendir langan bolta upp völlinn og eðlilega nær dómari leiksins ekki að hlaupa á hraða boltans. Hann er því nokkuð langt í burtu þegar brotið á sér stað, en hins vegar er annar aðstoðadómarinn vel staðsettur og í svona atvikum verður hann að vera klár í það að dæma. Nú getum við því miður ekki lagt mat á samskipti dómaratríósins í þessu tilfelli en þegar þeir sjá þetta aftur á myndbandi þá er líklegt að þeim finnist þeir hafa gert mistök með því að dæma ekkert.

Mat Þriðja liðsins – Aukaspyrna rétt fyrir utan teig og rautt spjald á varnarmann Stjörnunnar þar sem sóknarmaður ÍBV er kominn einn í gegn og er rændur upplögðu marktækifæri.

Í sama leik verður að gefa dómaratríói leiksins mikið hrós fyrir þrjú atvik. Í fyrra marki Stjörnunnar lætur dómari leikinn halda áfram þó svo að brotið sé á leikmanni Stjörnunar á miðjunni. Í stað þess að dæma strax gefur hann merki um hagnað og upp úr því nær sóknarmaður Stjörnunnar að skora. Vel gert og við viljum sjá meira af þessu í sumar. Dómari leiksins dæmir einnig tvö víti í leiknum á markmann Stjörnunnar. Hárréttar ákvarðanir í bæði skiptin og sérstakt hrós á hann fyrir að hafa pung í að dæma í seinna skiptið þegar markmaðurinn hoppar í bakið á sóknarmanni ÍBV. Maður sér allt of oft dómara leyfa markvörðum að komast upp með að keyra/hoppa inn í bak sóknarmanna, en þarna var ekkert elsku mamma í boði og vonandi er þetta það sem koma skal. Markverðir eru ekkert gullagull inn í vítateig.

Mat Þriðja liðsins – Báðir vítaspyrnudómarnir réttir og sérstakt hrós á dómara leiksins fyrir að taka af festu á bakhrindingu markmannsins í seinna vítinu.

Var boltinn farinn út af? Í síðasta uppgjöri töluðum við um mark eða ekki mark hjá Valsmönnum gegn KR. Í þessari umferð eru Valsmenn aftur í umræðunni á svipuðum nótum. Valur skoraði mark gegn Keflavík sem er dæmt ógilt því boltinn hafði skömmu áður farið aftur fyrir endamörk að mati aðstoðadómara. Boltinn verður að vera kominn ALLUR yfir línunni til að hægt sé að dæma hann út af. Munurinn á þessu atviki og mark/ekki mark í 1. umferð, er að núna var aðstoðadómarinn alveg niður við hornfána og því í langbestu aðstöðunni til að sjá þetta. Hann var sem sagt með beina línu við boltann og ætti því að hafa náð þessu. Því miður höfum við ekki séð neina mynd eða myndbandsupptöku sem getur skorið úr um þetta. Spurning um að ljósmyndarar landsins fari að stilla sér upp við endalínurnar í leikjum Vals?

Mat Þriðja liðsins – Ekki hægt að leggja faglegt mat á þetta með fyrirliggjandi gögnum. Menn get reynt að reikna út skugga eða hvernig kurlið kastaðist til. Aðstoðadómarinn var í beinni línu við atvikið, treystum honum.

Af hverju ekki rautt? Algengasta fyrirspurnin eftir 2. umferð var hvort tækling varnarmanns Vals á miðjumanni Keflavíkur hafi ekki frekar átt skilið rautt spjald, en varnarmaður Vals fékk gult fyrir tæklinguna. Varnarmaðurinn var með báða fætur á lofti og fór beint í fót Keflvíkingsins og það er alltaf rautt spjald. Svona tæklingar eru stórhættulegar og eiga ekki að sjást í íþróttum yfir höfuð. Af myndbandsupptöku frá Stöð 2 Sport sem er með nákvæmlega sama sjónarhorn og varadómari leiksins hafði, fer þetta ekki á milli mála og þar sést líka að dómari leiksins er með hreint sjónarhorn og stendur ekki nema í um það bil 5 metra fjarlægð frá brotinu (sjá mynd – dómarinn er þessi í gulu treyjunni). Það er rétt að benda á það að varadómari hefur fullt vald til þess að gefa sitt álit á brotum inná vellinum líkt og aðstoðardómararnir. Þriðja liðið vonar að í komandi umferðum sjáum við ekki fleiri svona brot, en ef svona atvik koma upp aftur verða dómarar landsins að lyfta rauða spjaldinu samstundis.

Mat Þriðja liðsins – Skólabókardæmi um RAUTT spjald.

Þriðja liðið ætlar að brydda uppá þeirri nýjung að velja íþróttafréttamann hverrar umferðar og mun hann hljóta nafnbótina Fagmaður umferðarinnar. Fagmaður 2. umferðar er Andri Karl á mbl.is. Var með gríðarlega góða textalýsingu frá leik FH og Fylkis. Metnaðurinn skein í gegn þar sem maður fékk stöðuuppfærslu nánast á hverri mínútu leiksins.
Athugasemdir
banner
banner