Hvernig er stemningin hjá Víkingi Ó.?
Það er mjög góð stemmning innan liðsins. Ég myndi segja að við höfum aldrei verið jafn samheldnar og við erum núna og það skiptir miklu máli. Það er alltaf mjög gaman hjá okkur, bæði innan vallar sem og utan. Við erum mjög duglegar að peppa hvora aðra, hvort sem það er í leikjum eða á æfingum. Þetta hefur verið frekar erfitt sumar og liðið hefur lent í allskonar áföllum en ég er rosalega stolt af því að það hafi þétt hópinn og við lært helling af því. Við gefumst aldrei upp og erum alltaf tilbúnar að gera allt fyrir hvora aðra.

Hvernig er liðið byggt upp?
Í heildina erum við með mjög ungt lið. Meirihluti hópsins eru stelpur sem ennþá eru gjaldgengar í yngri flokkum. Síðan erum við nokkrar í kringum tvítugt sem erum svona kjarni liðsins en við höfum spilað með meistaraflokknum síðan hann var stofnaður. Eins og er erum við með tvo útlendinga að spila með okkur.

Ertu ánægð með spilamennsku þíns liðs í sumar?
Já, ég er heilt yfir mjög ánægð með spilamennskuna í sumar. Ég held að ég geti kannski bent á tvo leiki þar sem við spiluðum ekki á okkar bestu getu. Annars höfum við verið inni í nánast öllum leikjum og spilað vel en því miður hafa úrslitin ekki dottið okkar megin. Við höfum verið rosalega "óheppnar" í sumar. Liðið hefur lent í mörgum áföllum eins og að missa lykilleikmenn í meiðsli eða annað og hafa þær allra yngstu í hópnum því þurft að stíga upp.

Hvert er markmið sumarsins hjá ykkur?
Aðalmarkmiðið er að halda okkur uppi.

Lýstu liðinu í þremur orðum:
Duglegar, pirrandi jákvæðar, metnaðarfullar

Hvað hefur komið þér mest á óvart í deildinni í sumar?
Hvað úrslit leikjanna hafa oft verið óvænt. Það sýnir að það geta allir unnið alla í þessari deild.

Komdu með eina skemmtilega staðreynd um félagið sem fólk veit ekki um:
Við fórum í Ungar-Gamlar um daginn. Það voru 17 ára stelpur í "gamla" liðinu. Það segir allt sem segja þarf.

Eitthvað að lokum:
Allur stuðningur skiptir okkur ótrúlega miklu máli svo við viljum fá alla á völlinn! Áfram Víkingur Ó!