Sísí átti flottan leik á miðjunni hjá ÍBV og skoraði jöfnunarmark liðsins úr vítaspyrnu á lokamínútunum
„Þetta er ágætis stig á erfiðum útivelli,“ sagði Eyjakonan Sigríður Lára Garðarsdóttir er hún var innt eftir hennar fyrstu viðbrögðum við 2-2 jafnteflinu gegn Stjörnunni.
Lestu um leikinn: Stjarnan 2 - 2 ÍBV
„Við ætluðum okkur sigur og náðum að skora rétt fyrir hálfleik en náðum svo ekki alveg að halda. Það var þvílíkur karakter að koma til baka og ná þessu jöfnunarmarki“
Jöfnunarmark ÍBV kom í lokin á leiknum þegar hendi var dæmd á Kim Dolstra, varnarmann Stjörnunnar. Einhverjir vildu meina að Kim hefði handleikið boltann utan teigs og aðspurð um dóminn glotti Sísí og vildi lítið um hann segja enda dómarans að taka ákvörðunina. Sísí fór sjálf á punktinn og skoraði af miklu öryggi.
„Ég er búin að æfa þetta smá. Ég tók nokkur víti í gær og var smá stressuð,“ sagði landsliðskonan um vítaspyrnuna.
Þór/KA tapaði óvænt stigum fyrir norðan og Sísí er bjartsýn á framhaldið þó að ÍBV hafi ekki náð að vinna í kvöld og saxa þannig á forystu toppliðsins.
„Deildin er bara opin og mér finnst hún gríðarlega jöfn. Bæði í topp- og botnbaráttunni þannig að þetta verður spennandi seinni hluti.“
Hægt er að horfa á allt viðtalið við Sísí í sjónvarpinu hér að ofan.
Athugasemdir