Brynjar Þór Gestsson, þjálfari Þróttar Vogum var að vonum ánægður með sigur sinna manna gegn Vængjum Júpíters í 3. deildinni í dag.

Sigurinn var gríðarlega mikilvægur fyrir Þrótt í baráttunni um að komast í 2. deild.

„Við vorum með bakið uppvið vegg og þurftum að vinna. Þetta var hörkuleikur, jafn leikur. Tölurnar gefa kannski ekki alveg rétta mynd. Þetta var bara stál í stál," sagði Brynjar.

Þróttur er með pálmann í höndunum í baráttunni um að komast í 2. deildina en Brynjar er ekki á því að eftirleikurinn verði auðveldur, þrátt fyrir að Þróttur mæti nýföllnum Reynismönnum í lokaumferðinni.

„Reynisliðið er með hörkulið. Þeir eru að vísu fallnir en þeir horfa á Þrótt, sem eiga möguleika á að fara upp og þeir gefa það ekkert."

Þróttur vann Vængi Júpíters 3-0 í dag og nefndi Brynjar nokkur atriði sem voru lykillinn að sigrinum í dag.

„Mér fannst það vera gredda og gæði. Það eru gæði í Marteini sem hefur verið svolítið í frysti í sumar. Hann hefur ekki fengið marga sénsa. Hann tók það bara í dag og sýndi hvað hann getur. Hann afgreiddi þessi færi sín alveg gríðarlega vel. Ég held að menn hafi komið aðeins afslappaðari út í seinni hálfleik og náðum við að halda boltanum meira."