„Þetta er örugglega minn stærsti leikur á ferlinum," segir Böðvar Böðvarsson, leikmaður FH og U21-landsliðsins. Íslenska U21-liðið mætir Úkraínu 16:45 á Laugardalsvelli á morgun en með sigri tryggir Íslands sér sæti í lokakeppninni sem fram fer í Póllandi á næsta ári.
„Ég er ekki byrjaður að finna fyrir neinu stressi núna en það kikkar kannski inn á morgun. Við erum með það reynslumikinn hóp að menn eru ekkert að deyja úr stressi. Við ætlum ekki að missa af þessu tækifæri. Við eigum von á mjög erfiðum leik á morgun en setjum kröfu á okkur að vinna."
Böðvar var í úrvalsliði ársins í Pepsi-deildinni sem bakvörður en spilaði á miðjunni hjá U21-landsliðinu í sigrinum gegn Skotlandi á dögunum.
„Það er ekki búið að tilkynna liðið á morgun en ég hef á æfingum verið á miðjunni. Ég var mjög sáttur við leik minn og liðsins í síðasta leik," segir Böðvar en viðtalið má sjá í heild í sjónvarpinu hér að ofan.
