Argentína mætti Panama í 2. umferð Copa America í nótt en bæði lið höfðu sigrað leiki sína í fyrstu umferð.

Argentína lagði ríkjandi meistara Síle að velli og Panama hafði betur gegn Bólivíu, en Panama hefur gengið merkilega vel í landsleikjum á undanförnum árum.

Varnarmaðurinn Nicolas Otamendi kom Argentínu yfir snemma í leiknum. Argentínumenn héldu boltanum vel en Panama varðist vel og beitti hættulegum skyndisóknum.

Það var smá óró að færast í leik Argentínu í stöðunni 1-0 en þá var Lionel Messi var skipt inná á 61. mínútu. Það tók snillinginn smávaxna aðeins sjö mínútur að skora og skömmu síðar kom Sergio Agüero inn fyrir Gonzalo Higuain.

Messi bætti öðru marki sínu við á 78. mínútu og fullkomnaði þrennuna níu mínútum síðar og gerði því þrennu á nítján mínútum.

Aguero gerði fimmta og síðasta mark leiksins á lokamínútunum og stórsigur Argentínu staðreynd.