„Ég komst 100% í gegnum hann. Það var test á nárann í þessum leik. Ég sparkaði ekki af fullum kraft þar, ég ákvað að bíða með það þangað til hér í Rússlandi. Ég fann ekki neitt á æfingunni í gær og ég er í góðum málum," sagði Hannes fyrir æfingu landsliðsins í dag.

Guðmundur Hreiðarsson, markmannsþjálfari íslenska landsliðsins, sagði eftir æfingu í gær að það hefði verið eins og markmennirnir væru með bakpoka með einhverjum steinum í byrjun á æfingu í gær. Hannes ræddi við markmannshópinn í kjölfarið og léttara var yfir mönnum eftir það.

„Þetta var svolítið þrúgandi andrúmsloft og það hefur aðeins vantað léttleikann á markmannsæfingarnar upp á síðkastið. Ég veit ekki hvort það sé eitthvað stress í mönnum eða hvað. Ég sagði nokkur orð og það var ágætt. Núna eru menn brosandi og það er stemning í mannskapnum. Það er það sem þarf til að menn nái sínu besta fram."

„Markmannsæfingar geta verið það skemmtilegasta sem maður gerir, ég tala nú ekki um við svona aðstæður. Maður á að njóta þess og ekki taka hlutunum of alvarlega. Við eigum að standa saman í því sem við erum að gera og reyna að skapa smá stemningu á æfingu. Ég hef átt í mjög góðu sambandi við markmenn liðsins hingað til og það verður þannig líka núna. Þetta eru allt toppmenn og okkur líkar vel við hvern annan."

Hannes segist finna fyrir þvi að Rúnar Alex Rúnarsson og Frederik Schram eru að setja pressu á markmannsstöðuna.

„Þeir eru báðir frábærir markmenn sem hafa ýmislegt sem að mig hefur kannski skort í mínum stíl. Við erum ólíkir. Maður finnur að það er pressa og samkeppni. Rúnar Alex er búinn að standa sig frábærlega með Nordsjælland sem er miklu ofar en við í dönsku deildinni. Maður finnur að hann er hungraður og Frederik er það líka."

Hér að ofan má sjá viðtalið í heild sinni.