Rihanna, sem kemur frá Barbados, er ein þekktasta söngkona heims um þessar mundir en margir kannast kannski við smellina Umbrella, Rude Boy og We Found Love.

Hún hefur mikinn áhuga á knattspyrnu eins og sást á HM í Brasilíu í sumar en hún átti þó í miklum erfiðleikum með að finna sér uppáhaldslið.

Hún hélt þó með Þjóðverjum á endanum og skemmti sér með þeim eftir mótið en hún hefur nú áhuga á að kaupa félag í ensku úrvalsdeildinni.

Rihanna sagði frá því fyrir nokkru síðan að Liverpool væri hennar lið á Englandi en Daily Mail og El Mundo Deportivo halda því fram að hún vilji kaupa hlut í félaginu.

Liverpool er í eigu Fenway Sports Group en það er aldrei að vita nema félagið selji henni smá hlut í enska stórliðinu.