Ísland í dag - FH getur nánast tryggt titilinn

Það er lúxusdagur fyrir knattspyrnuáhugafólk í dag.

Heilir fjórir leikir í Pepsi-deildinni en FH fær Breiðablik í heimsókn í stórleik umferðarinnar. Vinni FH leikinn, geta þeir nánast farið að opna kampavínið og byrjað að fagna Íslandsmeistaratitlinum. Breiðablik getur hins vegar haldið mótinu spennandi með sigri og minnkað muninn á toppnum niður í fjögur stig.

Það er annar gríðarlega mikilvægur leikur í Árbænum en þá mætast Fylkir og Víkingur Ó. Fylkismenn geta með sigri sett mikla pressu á ÍBV en þeir geta komist stigi á eftir Eyjamönnum. Víkingur Ó. getur svo endnalega farið að fagna öðru ári í Pepsi-deildinni, takist þeim að vinna.

Þróttur fær svo ÍA í Laugardalnum og Stjarnan og Valur mætast svo í Garðarbænum í áhugaverðum leik.

Einnig er leikið í Pepsi-deild kvenna en ÍBV og KR mætast í Eyjum á meðan Selfoss og Þór/KA eigast við en KR og Selfoss eru í miklum fallslag.

Það er mikil spenna í 2. deildinni en Afturelding og Grótta eru í mikilli baráttu um sæti í 1. deildinni að ári. Þau eru jöfn á stigum og mega þau alls ekki við að misstíga sig, ætli annað þeirra sér að fara með ÍR upp um deild.

Keflavík mætir svo Haukum í 1. deild kvenna en þar er barist um sæti í Pepsi-deild kvenna.