,,Í ljósi þess hvaða leikmenn eru að spila fyrir Belga þá er þetta mjög erfiður leikur," segir Heimir Hallgrímsson annar af landsliðsþjálfurum Ísland um vináttuleikinn gegn Belgum annað kvöld.
,,Þetta er heimsklassa lið sem við erum að fara að spila á móti. Það skiptir miklu að fá að spila á móti góðum þjóðum eins og Belgum og það gefur mönnum heilmikið að mæta mönnum eins og Eden Hazard."
,,Þessi leikur á eftir að skila sér í reynslubankann. Auðvitað förum við í leikinn til að reyna að spila vel og vinna en við viðurkennum það líka að þetta verður mjög erfiður leikur."
Heimir og Lars Lagerback hafa gefið út að einhverjir leikmenn verði hvíldir í leiknum á morgun.
,,Við höfum verið með sama byrjunarlið í þrjá leiki í röð og við ætlum að reyna að gefa einhverjum leikmönnum frí, allavega hluta af þessum leik. Við munum örugglega sjá leikmenn sem hafa spilað lítið fyrir íslenska landsliðið fá tækifæri en hversu mikið verður að koma í ljós."
Marc Wilmots, landsliðsþjálfari Belga, tillkynnti byrjunarliðið á Twitter í dag. Íslenska liðið verður kynnt á morgun en Heimir reiknar ekki með að nýta Twitter í það.
,,Sem betur fer erum við Lars ekki mikið á Twitter, þannig að það er engin hætta á því," sagði Heimir léttur.
Hér að neðan má sjá Twitter færslu Wilmots með byrjunarliðinu.
Deze elf starten morgen: Courtois, Vanden Borre, Alderweireld, Lombaerts, Vertonghen, Witsel, Dembele, Fellaini, Januzaj, Hazard, Benteke
— Marc Wilmots (@WilmotsMarc) November 11, 2014
Athugasemdir