,,Við ætlum að reyna að hvíla á sem eru tæpastir og hafa spilað mest en það er erfitt að hvíla menn gegn liði eins og Belgíu. Það er hættulegt og kannski líka smá óvirðing ef við hvílum þá leikmenn sem hafa verið að spila fyrir okkur," sagði Heimir Hallgrímsson annar af þjálfurum Íslands við Fótbolta.net í dag.

Gylfi Þór Sigurðsson hefur glímt við smávægileg meiðsli á tímabilinu og Heimir reiknar með að hann fái einhverja hvíld á morgun.

,,Ef Gylfi mætti ráða þá myndi hann byrja og spila 90 mínútur. Sem betur fer höfum við eitthvað um það að segja. Vonandi getum við gefið honum einhverja hvíld á morgun," sagði Heimir.

Hannes Þór Halldórsson hefur varið mark Íslands í undankeppninni en ljóst er að annað hvort Ingvar Jónsson eða Ögmudur Kristinsson koma við sögu á morgun.

,,Við leyfum örugglega öðrum að spila í marki á morgun. Hver það verður og hversu mikið kemur í ljós á morgun," sagði Heimir leyndardómsfullur.